قصه سندريلا ليبيه

قصة سندريلا الليبيه:
قالك مرة في بنت تحلم بأن مرت بوها تنوض فيها من النوم و تعرفوا عاد تنويض الليبيين تخبيط وعياط قريب تطيح من فوق السرير من الهز المهم ...
مرت الأب : يا بنت يا سندريلا نوضي يا بنت يشيط ريقك يعطيك خبطة تطيرلك رأسك .
سندريلا : مرت بوي خليني شويه بس نكمل الحلم .
مرت الأب : تي قتلك نوضي يا بنت خير لك قاعده صابره عليك ناضت قيامتك نوضي .
و رضت سندريلا بالامر الواقع و ناضت و هيا عين مفتوحة وعين مغمضة و العقل هايم في الحلم سندريلا وهيا تأفأف ...
مرت الأب : بالك نوضي ديرلي زميطة و طاسة حلبه و ضمي الحوش معاش وقت بنمشي .
سندريلا : وأنتم وين ماشيين متكمين و لابسين شلاتيت العيد ؟
مرت الأب : ماشيين لعزومة الأمير اللي بيختار فيها عروسته .
سندريلا : بالله خذوني معاكم خاطري نمشي نتفرج !!
مرت الأب : تمشي !!! وين تمشي يا حنه مشي عليك طاراطوري ... وأنتي متبهدله وزي الشحاته لا لبس و لا منظر ... أسمعي بنولي نلقى الحوش زي المراية و الشياه سارحه بيهم و الدجاج موكلتهم ... ومشت مرت الأب وبناتها الثلاثة ( ضاوية وحبس الزين ورابحه ) وقعدت سندريلا مسكينة تعيط و تندب في حظها ... و فجأة طلعتلها الســاحرة من الثلاجة متاع الميه !!
الساحرة قالت لسندريلا : العفو يا ربي خيرك يا سندريلا ؟؟
سندريلا : خليني في همي نبي نمشي للعزومة و مرت بوي مخلتنيش نمشي بسرافتي هذي وما عنديش رصيد أقل من دقيقة بالله اللي ما عنداش في العسل ولو تكون أمه نحلة .
الساحره : أنا النحلة أنت تدللي بس و طلعت من شلامتها الثريا و أتصلت بمانجو وكلمت مدام رشا وقالتلها نبي قفطان مقوم ملبستاشي بنت من قبل ولا بعد و معاه كندرة كعب على الدور الثالث ماركة و شنطة نويزكة مادابيك لويس فيتون...
ولبست سندريلا ومكيجتها بسطل الزواق وتكمتها وخطمتها على مزين فريده خشي "قريدة تطلعي وريده" وفرحت سندريلا و بخت صنة رجالية لأن الجهل مصيبة !!
بس الساحره قالتلها قدامك للساعه 12 ردي بالك أطنشي يعجبك الجو وتفوتيني أنت اللي بتنفضحي و ترجعي لسرافتك و صناناتك أنا رأسي يابس و الله نشهدر بيك
سندريلا : اللطف و أنا نقدر نديرها ؟؟
طلعت سندريلا من الحوش لقت الساحره موتيتلها سيارة كامري ركبت سندريلا لعند فيلة الأمير و جمــالها بهر كل الضيوف و أول ما جت عين الأمير عليها مشالها و قاللها ممكن رقصة يا بعيصة وافقت و هي تبتسم ... و فجأة الجو سكت و الفرقة وقفت العزف يشرين تليفون سندريلا نص تشرينه تشوف للرقم تلقاها الساحرة تشوف للساعه تلقاها الساعة 12 تمشي تجري وتصيح نهاري الأحرف الساعة 12 و عطتها الشياط للباب و جري في جرتها ملحقهاش و هيا تجري زي الخيل الجامح والأمير ينادي خيرك يا دعوه تعالي هني و هيا نازله من الدروج طاحت فردة من كندرتها خلتها و مشت .. خداها الأمير المتشحط و نادى علي الوزير و قاله كيف الدباره خشت خاطري البنت و لازم نلقاها ما تعرفش هيا من عيلة من ؟؟ دبرلي حل يا لؤي ...
فقال الوزير : ما فيش حل إلا نديروا سكان للكندره و نبعتوها مسجات علي الموبايل و علي الفيس بوك و علي كل المواقع و نزلوا فيها إعلان في الجرائد و المجلات و توا صاحبة الكندرة تبان ... وما صدقوا البنيات إلا هذي تقول كندرتي و طوابير من البنات تستنه في الدور للقياس و الأمير أعصابه محروقة و الوزير بدي يصبصب بالعرق و مفيش وحده جت عليها الكندرة ... لين بالصدفة سندريلا أستحقت جرايد باش تلمع المرش أعطتها رابحه الجريدة و كان مكتوب عليها علي صاحبة الكندرة اللي في الإعلان الحضور جري للفيلا ... فرحة سندريلا و قعدت تقيس فيها و تنقب لين قالت بينها و بين نفسها و الله معاد فيها كيف الأمير و طيحته خلي مرات بوي تغني هيا و العوانس الي عندها و ما صدقت سندريلا مشت حفيانه خدت ايفيكو بربع جني للفيلا وأول ما وصلت لقت الأمير مقعمز على المرشبيدي و خلوقه في وذنه ينفخ و يغني "ما طيرته طار بروحه عايش وحداني" ...
قالت له : هاني رجعت !!
وقف علي رجليه و قال شكلي نتخيل !!
قالت له : لا أنا رجعت غير كنت في الحفلة ناسيه الغساله تخدم .
المهم خداها من ايديها و دارو عرس مقوم بالزكرة و الزمزمات و ما عزموش مرات بو سندريلا و عوانسها

وناضت البنت تلقى روحها معومة بالميه مبزع عليها بوها سطل باش تنوض و قالت و هيا تبكي النهار المبارك حتى الحلم مستكثرينها عليا ؟؟
تمت الحكايه و زوة الزوايه

بس انتى من اى بلد

اها شكرا على مروركم

القصة جنااااااااااااااااااااااااااااااااااااااااان حلوة جدا ><



شكرا

شكرا بس ما فهمتها :3 :3 :3

ححلللووةةةة اعرفها شفتها من زمان تجننن والحين تذكرتها